Greina verkinn. Ungabörn gráta og láta þannig í ljós sársauka. Eldri börn sem tala geta sagt frá. Þó er það þekkt að börnin eru að reyna að „vera dugleg“ og tjá sig ekki um sársauka. Það er hlutverk hjúkrunarfólks að vera vakandi fyrir líðan barnsins en oftast eru það þó foreldrarnir sem skynja best líðan barna sinna. Foreldrar ættu að vera óhræddir um að biðja um verkjalyf fyrir börn sín ef þeim finnst ástæða til.

Meta verkinn. Það getur verið erfitt að meta verki hjá börnum, einkum þeim yngstu. Ýmis hjálpartæki eru til, svo sem myndir af missælum andlitum og kvarðar sem börnin benda á til að gefa líðan sína til kynna. Reyna þarf að meta líðan barnsins sem best og sætta sig ekki við „lítinn verk“ – hann á bara eftir að versna.

Róandi lyf, svo sem phenergan, klóralmixtúra og midazolam (Dormicium) – eru ekki verkjalyf en virka vel með þeim og auka áhrif þeirra. Þessi lyf róa barnið og bæta svefn og slökun. Sum þeirra valda einnig gleymsku í stuttan tíma en slíkt getur verið ákjósanlegt. Þá má nefna að phenergan dregur úr kláða sem oft kemur fram í sárunum fyrst eftir aðgerð.